Наглядчык — 900 рублёў: каго шукаюць на працу беларускія турмы і калоніі

Наглядчыку ў гродзенскай турме №1 абяцаюць плаціць больш — 1,5 тысячы рублёў. Патрабаванні невысокія: узрост да 28 гадоў, агульная сярэдняя адукацыя і прыдатнасць да службы ў органах унутраных спраў. Шукаюць на пасаду дзесяць чалавек. У гэтай турме нямала палітвязняў, напрыклад, Мікалай Аўтуховіч, Мікалай Дзядок і Алесь Пушкін.

У магілёўскай турме №4 наглядчыку абяцаюць 1200-1250 рублёў. Крытэрыі тыя ж: скончыць школу і пасаваць паводле ўзросту і здароўя. У гэтай турме ўтрымліваюцца палітвязні Дзяніс Урад і Сцяпан Латыпаў.

Наглядчыкам, якія працуюць у папраўчых калоніях-паселішчах, плацяць у тым жа дыяпазоне: напрыклад, ПКП №26 у Дзятлаўскім раёне шукае кантралёра на стаўку ў 1300 рублёў. Абяцаюць гнуткі графік. А ў ПУАТ №11 ("хімія"), дзе цяпер, паводле звестак праваабаронцаў, знаходзяцца 11 палітвязняў, шукаюць двух наглядчыкаў на заробак ад 800 да 1100 рублёў.

Дактары, прыбіральшчыкі, (моцныя) гаспадарнікі

Вядома, не толькі наглядчыкамі жывуць калоніі і турмы. Патрэбныя туды і іншыя работнікі — і таксама не на казачныя заробкі.