Косінец лічыць Лукашэнку галоўным героем дэмаграфічнай праграмы
Аляксандр Лукашэнка з'яўляецца галоўным героем у рэалізацыі Праграмы нацыянальнай дэмаграфічнай бяспекі. Пра гэта заявіў кіраўнік Адміністрацыі прэзідэнта Аляксандр Косінец у інтэрв'ю праграме "Контуры" тэлеканала АНТ, якое паказалі ўвечары 3 студзеня.
Косінец: "Практычна штохвілінна гэтая праграма знаходзілася ў полі зроку прэзідэнта. Я дванаццаць разоў яму дакладаў пра ход і вынікі яе рэалізацыі. Таму калі казаць, хто галоўны герой, я практычна і адказаў".
Па словах Косінца, Лукашэнка даручыў ураду распрацаваць такую праграму яшчэ ў 2000 годзе, аднак зрабілі гэта толькі ў 2005-2006 гадах. На рэалізацыю праграмы было вылучана 350 млн долараў.
Чыноўнік зазначыў, што паводле песімістычных прагнозаў, у 2015 годзе ў Беларусі павінна было застацца 8,5 млн чалавек. Аднак дзякуючы праграме дэмаграфічнай бяспекі цяпер насельніцтва краіны складае 9,5 млн чалавек — ажно на 1 мільён больш.
