Ціханоўская паразмаўляла з прэзідэнтам Літвы пра пашырэнне санкцый
Апошнія падзеі ў Беларусі яны абмеркавалі па відэасувязі.
Святлана Ціханоўская паразмаўляла з прэзідэнтам Літвы Гітанасам Наўседам пра пашырэнне санкцый у дачыненні афіцыйнага Мінска. Апошнія падзеі ў Беларусі яны абмеркавалі па відэасувязі. Гэта — забойства Рамана Бандарэнкі, рэпрэсіі, звальненне паўсотні супрацоўнікаў "Беларуськалія", дапамога рэпрэсаваным. Ціханоўская падзякавала за жорсткую пазіцыю Вільні ў адносінах уладаў Беларусі. Гаворка ішла і пра збор даных пра злачынствы, якія адбыліся ў нашай краіне пасля прэзідэнцкіх выбараў. Наўседа паабяцаў, што Літва падтрымае працу "па міжнародным расследаванні злачынстваў супраць правоў чалавека".
Як вядома, ЕС рыхтуе пашырэнне санкцый супраць афіцыйнага Мінска. У яго "чорным спісе" пакуль 55 чалавек, адказных за фальсіфікацыі выбараў і гвалт супраць мірных пратэстоўцаў. Краіны Балтыі днямі ўзгаднілі свой агульны беларускі "чорны спіс", у ім 156 прозвішчаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.