Звольнены дырэктар школы: "Камусьці не хапіла праўдзівасці і сумленнасці"

Звольнены дырэктар Яўген Макарэвіч / "УКантакце"
Звольнены дырэктар Яўген Макарэвіч / "УКантакце"

1 красавіка з маладзечанскай школы №5 звольнілі дырэктара Яўгена Макарэвіча. Падчас прэзідэнцкіх выбараў на размешчаным у школе выбарчым участку №29, старшынёй якога быў Макарэвіч, перамагла Святлана Ціханоўская. За яе прагаласаваў 741 чалавек, за Лукашэнку — 620.

Уволенный директор школы: “Кому-то не хватило правдивости и честности”
Фота пратакола аб выніках галасавання / Еўрарадыё

Пасля выбараў дырэктар сам падаў заяву на звальненне.

— Гэта было маё рашэнне. Таму што тыя, хто прымаў галасы, нядобра адгукнуліся пра вынікі, якія мы атрымалі на ўчастку. Маё рашэнне было не паддацца гэтаму ціску, — расказвае Еўрарадыё Яўген Макарэвіч. — У нашага кіраўніцтва была незадаволенасць, хоць я проста канстатаваў факт [абвяшчэнне вынікаў галасавання. — Еўрарадыё]. У нас на ўчастку былі незалежныя назіральнікі, і з выканкама была жанчына. Два чалавекі былі ад нашага калектыву, ад грамадскіх арганізацый.

Казалі, што нікога звальняць не будуць — "у кожным разе"

Праўда, чыноўнікі маладзечанскага ўпраўлення па адукацыі сказалі, што ніякіх заяў на звальненне ім не паступала.

"Нікога з дырэктараў мы не будзем звальняць у кожным разе. Большасць кантрактаў, якія заключаюцца на год, заканчваліся 30 чэрвеня. Яны падоўжаныя з усімі дырэктарамі. Што да Макарэвіча, то ніхто не будзе звальняць чалавека, якому застаецца да пенсіі паўтара года", — так 12 жніўня 2020 года ва ўпраўленні па адукацыі Маладзечна пракаментавалі сітуацыю выданню Kraj.by.

Макарэвіч кажа, што заяву на звальненне ён сапраўды пісаў, але ў аддзеле адукацыі яе страцілі. Цяпер яна "знайшлася" — чаму?

— Напэўна, час чакалі, — адказвае экс-дырэктар. — Я ж далей не ўдзельнічаў у праўладных аўтапрабегах, не падпісваў усе гэтыя прафсаюзныя лісты і гэтак далей. Напэўна, я ім надакучыў ужо са сваімі поглядамі. І напэўна, ім не хацелася б бачыць тое, што магу стаць прыкладам іншым. Таму, напэўна, і прынялі такое рашэнне.

Уволенный директор школы: “Кому-то не хватило правдивости и честности”
Яўген Макарэвіч на выпускным / "УКантакце"

Бацькі сабралі подпісы за тое, каб дырэктар застаўся

У верасні праз погляды на тое, што адбываецца ў краіне, са школы звольнілася намесніца дырэктара па выхаваўчай рабоце.

— Намесніца дырэктара яшчэ ў перыяд выбараў выказала сваю грамадзянскую пазіцыю, — кажа Яўген. — У адказ сказалі, што яна, як ідэолаг, павінна праводзіць палітыку, якая праводзіцца ў дзяржаве. Ну яна і вырашыла: раз такі недавер…

31 сакавіка бацькі вучняў сабралі подпісы супраць звальнення Яўгена Макарэвіча. Ліст адправілі начальніку ўпраўлення па адукацыі Маладзечанскага райвыканкама.

Уволенный директор школы: “Кому-то не хватило правдивости и честности”
Ліст бацькоў у абарону дырэктара / Еўрарадыё

Акрамя дырэктарства, Макарэвіч выкладаў у школе гісторыю. Вось як пра яго адгукаюцца нядаўнія выпускнікі:

— Прафесія ў яго складаная, але Яўген Васілевіч вельмі добры чалавек, магу сказаць толькі станоўчыя словы. На яго ўроках, на якіх мне ўдалося пабываць, было вельмі цікава, а за адказы ён ставіў тое, што заслужылі.

— Памятаю як спакойнага чалавека, чалавека здаровага сэнсу.

Тое, што цяпер адбываецца ў краіне, былы дырэктар называе складаным паслявыбарным перыядам.

— Проста, можа быць, камусьці не хапіла праўдзівасці і сумленнасці, камусьці, можа быць, не хапіла смеласці. Вы ж бачыце, што поствыбарная сітуацыя занадта зацягнулася.

Новай працы Яўген Макарэвіч пакуль сабе не знайшоў. Хто зойме пасаду дырэктара школы №5 Маладзечна, таксама пакуль невядома — пра гэта Еўрарадыё сказалі ў самой установе.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі