Вы тут

Зікрацкі — пра закрытыя суды: нязграбная спроба схаваць рэальнае становішча

Сяргей Зікрацкі / facebook.com/pressclubbelarus

Рашэнне ўлады праводзіць закрыты суд над Сяргеем Ціханоўскім, Мікалаем Статкевічам, Ігарам Лосікам, Уладзімірам Цыгановічам, Арцёмам Сакавым і Дзмітрыем Паповым парушае законы Беларусі. Пра гэта заявіў прадстаўнік Святланы Ціханоўскай па прававых пытаннях Сяргей Зікрацкі.

"Разгляд справы ў закрытым судовым пасяджэнні дапускаецца ў выключных выпадках: напрыклад, калі гаворка ідзе пра захаванне дзяржаўных сакрэтаў, прадухіленне распаўсюду звестак аб інтымных баках жыцця, у выпадках, калі злачынства здзейсніла асоба, якая не дасягнула 16-гадовага ўзросту.

Відавочна, што закрытыя суды — гэта нязграбная спроба схаваць ад грамадскасці рэальнае становішча спраў. Усім відавочна, што на працягу больш за год следства не сабрала ніводнага доказу вінаватасці Сяргея Ціханоўскага і іншых абвінавачаных па гэтай справе", — заяўляе Зікрацкі. 

Ён нагадвае, што нядаўна такі ж закрыты суд адбыўся над Паўлам Севярынцам, Ірынай Шчаснай, Яўгенам Афнагелем, Андрэем Войнічам, Паўлам Юхневічам, Дзмітрыем Казловым і Максімам Вінярскім. "Усе гэтыя людзі не здзейснілі нічога незаконнага, і рэжым проста баіцца, што гэта стане вядома ўсім, калі справа будзе слухацца адкрыта", — упэўнены юрыст.

Таксама не адпаведным закону ён лічыць тое, што суд будзе праходзіць у СІЗА. Адпаведна, на яго не змогуць трапіць сваякі палітвязняў. "Адзіны дакумент, у якім сказана пра магчымасць праводзіць выязныя судовыя пасяджэнні па-за памяшканнямі судоў, — гэта пастанова Пленума Вярхоўнага суда аб забеспячэнні галоснасці пры ажыццяўленні правасуддзя", — падкрэслівае Зікрацкі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.