За парушэнне выбарчага заканадаўства старшыню БТ фактычна не пакаралі
![За парушэнне выбарчага заканадаўства старшыню БТ фактычна не пакаралі](/sites/default/files/styles/gallery_main/public/2023-08/ww11.jpg.webp?itok=LDzDpNjM)
Праграма “Клуб рэдактараў” з удзелам старшыні Белдзяржтэлерадыёкампаніі Генадзя Давыдзькі была запісаная 11 верасня. У праграме абмяркоўвалася выбарчая кампанія, кандыдаты і іх праграмы. Аднак ад 10 верасня ён з’яўляецца даверанай асобай кандыдата ў прэзідэнты Аляксандра Лукашэнкі і паводле Выбарчага кодэксу Генадзь Давыдзька не меў на гэта права.
Па словах старшыні Цэнтрвыбаркама Лідзіі Ярмошынай, яны атрымалі скаргу ў сувязі з парушэннем Генадзем Давыдзькам выбарчага заканадаўства і адрэагавалі на гэта.
Ярмошына: “Зарэгістраваны ён быў у якасці даверанай асобы 10 верасня, а запіс праграмы адбываўся 11 верасня – на наступны дзень. Генадзю Браніслававічу было зробленае мной строгае папярэджанне. Лічыце, што гэта было персанальнае папярэджанне старшыні Цэнтральнай камісіі”.
Тым не менш, у Выбарчым кодэксе не прапісана такое пакаранне за парушэнне выбарчага заканадаўства, як “персанальнае папярэджанне старшыні Цэнтральнай камісіі”. У дакуменце сказана, што за здзейсненае даверанай асобай кандыдата ў прэзідэнты парушэнне выносіцца папярэджанне самому кандыдату. І што калі такіх папярэджанні будзе два, то кандыдата могуць зняць з выбараў.
З заўвагай Еўрарадыё, што накладзенае на Генадзя Давыдзьку пакаранне не прадугледжваецца Выбарчым кодэксам Лідзія Ярмошына пагаджаецца, але не больш за тое.
Ярмошына: “Няма ў Кодэксе такога. Гэта – прафілактычная мера ўздзеяння. А вам трэба, каб я яго падвергла расстрэлу за гэта?”
Нагадаю, “Клуб рэдактараў” з удзелам Генадзя Давыдзькі выйшаў у эфір канала БТ-1 13 верасня. Старшыня Беларускай асацыяцыі журналістаў Андрэй Бастунц звярнуў увагу, што паводле выбарчага заканадаўства “журналістам, службовым асобам сродкаў масавай інфармацыі забараняецца весці тэле- і радыёпраграмы, удзельнічаць у асвятленні выбараў праз сродкі масавай інфармацыі, калі названыя асобы з’яўляюцца кандыдатамі ў прэзідэнты альбо іх даверанымі асобамі”.
Кіраўнік Белдзяржтэлерадыёкампаніі Генадзь Давыдзька ў інэрв’ю Еўрарадыё сказаў, што ніякіх парушэнняў не было. Маўляў, калі праграма запісвалася, то ў яго на руках яшчэ не было мандата даверанай асобы кандыдата ў прэзідэнты.
Фота: belsat.eu