“Усё, чаго я прашу — проста кавалак лёду!” Самыя яркія цытаты Трампа ў Давосе

Прэзідэнт ЗША Дональд Трамп падчас эканамічнага форуму ў Давосе заявіў, што яму не патрэбны рэдказямельныя рэсурсы Грэнландыі. Маўляў, востраў патрэбны яму выключна для забеспячэння нацыянальнай бяспекі. Пазней ён дадаў, што гаворка ідзе ўжо пра бяспеку ўсяго свету. А пасля пераблытаў Грэнландыю з Ісландыяй.

Мы сабралі самыя яркія цытаты амерыканскага прэзідэнта з яго выступлення ў Давосе.

Пра ЗША

“ЗША трымаюць увесь свет на плаву”.

“Злучаныя Штаты вярнуліся. Большымі і мацнейшымі, чым калі-небудзь раней”.

“Вы нават не ўяўляеце, з якімі пагрозамі сутыкняцеся без нашай ваеннай падтрымкі”.

Пра Еўропу

“Я люблю Еўропу і хачу, каб яна квітнела, але цяпер яна рухаецца ў няправільным кірунку”.

“Ім трэба вырвацца з той культуры, якую яны стварылі за апошнія 10 гадоў. Жахліва тое, што яны робяць з самімі сабой. Яны разбураюць сябе, гэтыя цудоўныя мясціны”.

“Нам патрэбны моцныя саюзнікі, а не сур’ёзна аслабленыя. Мы хочам, каб Еўропа была моцнай. У канчатковым выніку гэта пытанні нацыянальнай бяспекі, і, бадай, ніводнае з сённяшніх пытанняў не ілюструе сітуацыю так выразна, як тое, што цяпер адбываецца з Грэнландыяй”.

“Нам патрэбны кавалак лёду, каб абараніць свет. А яны яго не аддаюць”.

Пра Грэнландыю

“Пасля (Другой сусветнай) вайны мы аддалі Грэнландыю Даніі. Якое ж гэта было глупства з нашага боку! Але мы гэта зрабілі. І наколькі яны цяпер няўдзячныя!”

“Злучаныя Штаты ў адзіночку могуць абараніць гэты гіганцкі масіў зямлі, гэты велізарны кавалак лёду, развіць яго і палепшыць. Зрабіць яго добрым для Еўропы, бяспечным для Еўропы — і карысным для нас. І менавіта з гэтай прычыны я шукаю магчымасць неадкладных перамоў, каб яшчэ раз абмеркаваць набыццё Грэнландыі Злучанымі Штатамі”.

“Усё, чаго я прашу — проста кавалак лёду!”

«Вы можаце сказаць “так” — і мы будзем удзячныя. Вы можаце сказаць “не”. І мы гэта запомнім».

“Некаторыя думалі, што я ўжыву сілу (каб забраць Грэнландыю). Мне не трэба ўжываць сілу. Я не хачу ўжываць сілу. Я не буду ўжываць сілу”.

Пра НАТА

“Злучаныя Штаты фактычна аплачвалі амаль 100 працэнтаў НАТА. І я гэта спыніў. Я сказаў: “Гэта несправядліва”. Але што яшчэ важнейшае — я дамогся таго, каб краіны (члены НАТА) плацілі 5 % (ВУП у бюджэт НАТА), і цяпер яны плацяць”.

“Праблема з НАТА ў тым, што мы заўсёды будзем побач з імі на ўсе 100 %. Але я не ўпэўнены, што яны будуць побач з намі”.

“Мы даём так шмат і атрымліваем так мала ўзамен”.

“У вас не будзе НАТА, калі вы не будзеце ўцягвацца”.

“Яны не цэняць таго, што мы робім. Я маю на ўвазе НАТА і Еўропу”.

Пра пошліны

“ЗША не збіраюцца субсідзіраваць увесь свет”.

“Без нас гэта ўжо не была б Швейцарыя. Без нас ніводная з прысутных тут краін не была б сабой”.

“Мы хочам з імі супрацоўнічаць. Мы не імкнёмся іх знішчыць. Я мог бы назваць (тарыф) у 39–40 %. Я мог бы сказаць, што хачу ўвесці тарыф у 70 % — і тады мы б зараблялі на Швейцарыі. Але Швейцарыя, верагодна, была б фінансава зруйнавана. Я не хачу гэтага рабіць”.

Жарты

Некаторыя тэзісы Трампа выклікалі сумны смех. А некаторыя жарты былі падрыхтаваны. Вось, напрыклад:

“Цудоўна зноў апынуцца ў прыгожым Давосе, у Швейцарыі, і выступаць перад такой колькасцю паважаных бізнес-лідараў, такой колькасцю сяброў і толькі нешматлікімі ворагамі”.