У "спіс тэрарыстаў" дадалі Сафію Сапегу і яшчэ 10 чалавек
![Сафія Сапега / БЕЛТА](/sites/default/files/styles/gallery_main/public/2023-08/Sap.jpg.webp?itok=lIILxosH)
Сафія Сапега / БЕЛТА
Камітэт дзяржбяспекі ўнёс у "спіс тэрарыстаў" яшчэ 11 чалавек, паведамляюць праваабаронцы. Цяпер у ім 1026 прозвішчаў, 278 з якіх належаць грамадзянам Беларусі.
Падставай для дадавання ў спіс КДБ назваў тое, што набылі законную моц прысуды па крымінальных справах, заведзеных за распальванне варожасці.
Новыя фігуранты спісу: Юрый Калодны, Мікалай Даніш, Барыс Кім, а таксама палітвязні Максім Ярашэнка, Сяргей Савіч, Арцём Воўна, Рыгор Грыг, Павел Мякіш, Валерый Барзенка, Андрэй Касцоў і расіянка Сафія Сапега.
Сафію затрымалі 23 траўня 2021 года разам з Раманам Пратасевічам, калі беларускія ўлады прымусова пасадзілі самалёт Ryanair. Дзяўчыну прызналі вінаватай у адміністраванні тэлеграм-канала, дзе публікаваліся звесткі беларускіх сілавікоў. Ёй прысудзілі 6 гадоў калоніі.
Лукашэнка заяўляў пра магчымасць перадаць яе ў Расю, аднак гэта так і не адбылося. Памілавання расіянка таксама не атрымала, хаця яе сям'я цалкам выплаціла кампенсацыі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.