У Славакіі адрэагавалі на затрыманне Ляшчэні: краіна падтрымае новыя санкцыі
Прэм'ер-міністр Славакіі Эдуард Хегер / Reuters
Затрыманне экс - пасла праз год пасля адстаўкі там лічаць "доказам неміласэрнасьці" рэжыму.
Славакія гатовая падтрымаць увядзенне новых санкцый супраць уладаў Беларусі, заявіў прэм'ер-міністр краіны Эдуард Хегер. Яго словы сталі рэакцыяй на затрыманне ў Мінску экс-пасла Беларусі ў Славакіі Ігара Ляшчэні.
Гэта затрыманне, якое адбылося амаль праз год пасля адстаўкі Ляшчэні, з'яўляецца "далейшым доказам неміласэрнасьці" рэжыму ў дачыненні да грамадзян, заявіў кіраўнік славацкага ўрада.
У сувязі з гэтым "Славакія разам з партнёрамі ў Еўрасаюзе не перастане ўзмацняць ціск, каб грамадзяне Беларусі атрымалі перспектыву жыць у бяспечнай, дэмакратычнай і свабоднай краіне", — цытуе Эдуарда Хегера агенцтва ТАСС.
Хегер заявіў, што Браціслава гатовая да далейшых санкцый. Славацкі прэм'ер таксама заклікаў Аляксандра Лукашэнку неадкладна вызваліць усіх палітвязняў.
У сераду, 11 жніўня, да Ігара Ляшчэні з ператрусам прыйшлі сілавікі. На наступны дзень ягонае прозвішча з'явілася ў спісах затрыманых, якія знаходзяцца ў ізалятары на Акрэсціна. Пазней стала вядома, што ён затрыманы ў рамках расследавання крымінальнай справы аб "масавых беспарадках" у Мінску. У СК удакладнілі, што Ляшчэню правяраюць на дачыненне "да здзяйснення дзеянняў, якія груба парушаюць грамадскі парадак". З ім праводзяцца следчыя дзеянні.
Да жніўня 2020 года Ляшчэня ўзначальваў беларускую дыпмісію ў Славакіі. Пасля выбараў асудзіў гвалт і падаў у адстаўку. Яго звольнілі, а следам Лукашэнка пазбавіў яго рангу Надзвычайнага і Паўнамоцнага Пасла "у сувязі са здзяйсненнем учынкаў, якія ганяць дзяржаўную (дыпламатычную) службу".
Ляшчэня быў удзельнікам праекта "Сход" — своеасаблівай альтэрнатывы Палаце прадстаўнікоў. Дэлегаты "Сходу" планавалі шукаць шляхі пераадолення крызісу праз перамовы. Пра мэты і задачы праекта Ляшчэня распавядаў у сакавіку ў інтэрв'ю Еўрарадыё.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.