У Кабуле невядомыя ўгналі ўкраінскі самалёт
Невядомыя ўгналі ўкраінскі самалёт, які прыляцеў у Кабул па грамадзян Украіны. Пра гэта "Грамадскаму радыё" распавёў намеснік міністра замежных спраў Украіны Яўген Енін.
"У мінулую нядзелю наш самалёт захапілі іншыя людзі. Яны былі ўзброеныя, у тым ліку агнястрэльнай зброяй. У аўторак у нас фактычна скралі самалёт — ён вылецеў у Іран з невядомай групай пасажыраў на борце замест таго, каб вывезці ўкраінцаў", — паведаміў дыпламат.
Енін не патлумачыў, ці вярнулі невядомыя захоплены самалёт і хто менавіта яго захопліваў.
Першы ўкраінскі самалёт 16 жніўня вывез з Кабула каля 80 чалавек, сярод якіх былі грамадзяне Украіны, Афганістана, Беларусі, Нідэрландаў, Харватыі, Таджыкістана.
Учора з Кабула прыляцеў трэці ўкраінскі самалёт, на борце якога былі 98 пасажыраў і 5 чальцоў экіпажу. Дагэтуль у Афганістане знаходзіцца не менш за 50 украінцаў і украінак.
