У Беларусі ўпершыню асвяцілі абраз, створаны штучным інтэлектам
Абраз, створаны штучным інтэлектам / katolik.life
Упершыню ў Беларусі (а магчыма — і ў свеце) асвяцілі абраз, створаны штучным інтэлектам. Новы абраз у касцёле святой Марыі Магдалены ў Новалукомлі 11 кастрычніка блаславіў арцыбіскуп-эмэрыт Тадэвуш Кандрусевіч.
Гэта абраз "кібер-апостала" — святога Карла Акуціса. Выява была спецыяльна створаная пры дапамозе штучнага інтэлекту. Пра гэта паведаміў пробашч парафіі ксёндз Мікалай Ліпскі, перадае katolik.life.
Карла Акуціса называюць апекуном моладзі, "заступнікам інтэрнэту" і "кібер-апосталам", а таксама "апосталам Эўхарыстыі". Гэты італьянскі хлопец праз інтэрнэт распаўсюджваў каталіцкую веру, стварыў інтэрнэт-каталог Эўхарыстычных цудаў і імкнуўся штодня ўдзельнічаць у святой Імшы.
Карла памёр у 15 гадоў і быў кананізаваны ў 2025 годзе, стаўшы першым святым "міленіялам".
Дарэчы, многія вернікі ў сацсетках крытыкавалі ідэю новалукомскай парафіі і казалі, што згенераваная ШІ выява не можа называцца абразом.
