У 2023 годзе на вайсковыя зборы ў Беларусі прызавуць мінімум 9 тысяч рэзервістаў
Вайсковец на "брані" / Еўрарадыё
У 2023 годзе на вайсковыя зборы ў Беларусі прызавуць як мінімум 9 тысяч рэзервістаў. Гэты план уладаў агучыў супрацоўнік Генштаба Узброеных Сіл Беларусі, палкоўнік Аляксандр Шальпук.
Па яго словах, столькі ж рэзервістаў было прызвана ў 2022 годзе. Шальпук сцвярджае, што да канца гэтага года новых збораў не прадбачыцца.
Палкоўнік нагадаў, што "партызанам" (так у войсках з'едліва называюць рэзервістаў, якіх прызываюць на зборы) за час знаходжання ў вайсковых часцях выплачваецца грашовае забеспячэнне. "Напрыклад, выплата лейтэнанту запасу за месяц на сёння складае 311 рублёў", — удакладніў ён.
За ваеннаабавязанымі, прызванымі на вайсковыя і спецыяльныя зборы, захоўваецца месца працы і пасада. Ім выплачваецца сярэдні заробак. А індывідуальныя прадпрымальнікі, тыя, хто часова не працуе ці беспрацоўныя грамадзяне атрымліваюць кампенсацыю ад мясцовых органаў улады — з разліку 15 базавых велічынь (480 рублёў) за адзін месяц.
