Трава і дрэвы замест новай дарогі. Як мінчукі адстаялі свой двор
У двары шматпавярховага дома №15 па вуліцы Кульман у Мінску з’явіўся новы газон. Замест яго тут мусілі быць разваротныя пляцоўкі для спецтэхнікі, але жыхары пачалі змагацца з “мадэрнізацыяй” тэрыторыі, якую задумалі ўлады Савецкага раёна Мінска. І дабіліся поспеху. З двара знікла спецтэхніка, а супраць будаўнікоў была распачатая адміністрацыйная справа.
“Працы спыненыя, чыноўнікі заціхарыліся. Да таго ж, пачалі адміністрацыйны працэс супраць падрадчыка, які пры правядзенні прац нанёс урон урадліваму слою зямлі, пашкодзіў газон і карнявую сістэму дрэваў, — распавядае адна з абаронцаў двара, яго жыхарка Інэса Барысевіч. — У спешным парадку яны аднавілі газон, засеялі, днём і ўначы гэты газон выраўноўвалі. Так, гэта вынік нашай барацьбы. Але невядома, чым скончыцца справа супраць падрадчыка. Яшчэ на мінулым тыдні тут хадзіла камісія з “Зелянбуда” і Мінпрыроды”.
Гісторыя пачалася ўвосень 2017-га, калі старэйшых па пад’ездах выклікалі ў адміністрацыю раёна і паказалі план добраўпарадкавання двара. Жыхары катэгарычна не пагадзіліся з тым, што замест парка, які быў высаджаны імі ўласнаручна сорак гадоў таму, з’явяцца сцежкі, новыя паркоўкі, месцы з кантэйнерамі для асобнага збору смецця і разваротныя пляцоўкі для смеццевозаў. Але тады ўлады не хацелі нічога чуць, і адказвалі, што ўсё робіцца згодна з нормамі.
Калі сёлета ля першых чатырох пад'ездаў дома пачалася высечка, людзі пачалі класціся пад бульдозеры, тэлефанаваць чыноўнікам, пісаць скаргі ў адміністрацыю прэзідэнта і пракуратуру. Жыхары іншых пад'ездаў, бачачы паваленыя дрэвы, горы друзу і тратуарный пліткі, бензапілы і самазвалы, пачалі пікетаваць будаўнічую пляцоўку.
Супрацьстаянне жыхароў і чыноўнікаў цягнулася месяц. Адміністрацыя раёна пачала спешна змяняць праект, нават запрасілі людзей пагутарыць у мясцовую ЖКГ. Размова была не з лёгкіх, але жыхары стаялі на сваім.
Вынікам свайго змагання жыхары задаволеныя: спецтэхніка з’ехала, газон адноўлены на большай тэрыторыі двара. Дзе-нідзе ўзвышаюцца горы друзу — дарогу ўздоўж дома яшчэ даводзяць да ладу. Замест высечаных дрэваў з’явілася паркоўка, але, па словах жыхароў, у двары змяшчаецца не больш машын, чым можна было паставіць раней.
Цяпер жыхары чакаюць восені — спадзяюцца, што адміністрацыя Савецкага раёна Мінска, як і абяцала, пасадзіць тут 28 маладых дрэваў. Столькі было знішчана падрадчыкам падчас “мадэрнізацыі” двара.
Еўрарадыё працягвае сачыць за змаганнем мінчукоў за свой двор.
