Студыя ZROBIM architects, куды прыходзілі сілавікі, аднавіла працу

Кампанія ZROBIM architects аднавіла працу пасля візітаў сілавікоў. Як піша выданне "Зеркало", большасць раней затрыманых супрацоўнікаў ужо адпусцілі. Таксама стала вядома, што менавіта цікавіла сілавікоў.

Ператрусы і затрыманні ў архітэктурнай студыі адбыліся 9 і 10 красавіка. У першы дзень былі затрыманыя ўсе супрацоўнікі, якія былі ў офісе — каля 50 чалавек. Сярод іх быў і сузаснавальнік кампаніі Андрэй Макоўскі (Андрусь Bezdar). 10 красавіка на працоўныя месцы выклікалі тых, каго не было ў офісе напярэдадні, і таксама затрымалі. Паведамлялася, што следчыя дзеянні праводзіў Дэпартамент фінансавых расследаванняў Камітэта дзяржкантролю.

Тады канал сілавікоў заявіў, што нагодай для візіту стаў допіс Макоўскага ў сацсетках пра тое, што дзяржорганы вымагаюць ад іх наняць у штат ідэолага.

Крыніца выдання "Зеркало" сцвярджае, аднак, што ідэалагічныя пытанні сілавікоў цікавілі мала: "Затрыманых супрацоўнікаў пыталі пра шэрыя схемы падаткаабкладання — гэта значыць, шукалі ўхіленне ад выплаты падаткаў. Па тэме 2020 года прайшліся хутчэй па датычнай".

Таксама суразмоўца выдання сказаў, што адпусцілі амаль усіх, каго затрымлівалі 9 і 10 красавіка. Але колькі чалавек застаюцца за кратамі і хто менавіта, дакладна невядома.

Тым часам офіс студыі вярнуўся да працы. 16 красавіка там прынялі тэлефанаванне журналіста, які звярнуўся пад выглядам кліента, і пацвердзілі, што кампанія працуе.