СМІ: Звольнены са сваёй пасады кіраўнік канцэрна "Белэнерга"

Генеральны дырэктар дзяржаўнага аб'яднання "Белэнерга" Яўген Воранаў адхілены ад пасады, паведамляе tut.by са спасылкай на ўласныя крыніцы.

Неафіцыйна паведамляецца, што падставай для звальнення стала "аднаразовае грубае парушэнне згодна з дэкрэтам №5". Гэты дакумент набыў моц 1 студзеня 2015 года і накіраваны на "ўзмацненне патрабаванняў да кіруючых кадраў і работнікаў арганізацый". 

Разам з тым, некаторыя крыніцы сцвярджаюць, што афіцыйнае рашэнне пра адстаўку Воранава яшчэ не прынятае. 

Воранаў быў прызначаны кіраўніком "Белэнерга" са згоды Аляксандра Лукашэнкі 22 красавіка 2013 года. 

Воранаву 56 гадоў. У энергасістэме ён працуе з 1986 года, пачаўшы з пасады інжынера цэха наладкі і выпрабаванняў. 

Таксама ён з'яўляецца першым намеснікам старшыні Беларускай федэрацыі дзюдо.