Партыя БНФ працягвае працаваць у Беларусі — Саранчукоў

Партыя БНФ "працуе па наладжанай схеме сувязяў" / Facebook

Партыя БНФ працягвае працаваць у Беларусі. Яна дзейнічае "ў прававым полі як зарэгістраваная структура". Пра гэта ў гутарцы з racyja.com заявіў выканаўца абавязкаў кіраўніка партыі Вадзім Саранчукоў. Сам ён з-за пераследу на радзіме больш за год жыве ў Літве.

Умовы, у якіх існуе Партыя БНФ, Саранчукоў называе складанымі: кіраўнік партыі Рыгор Кастусёў знаходзіцца за кратамі (сёлета асуджаны на 10 гадоў калоніі ўзмоцненага рэжыму, прызнаны палітвязнем), а намесніку старшыні Юрыю Меляшкевічу выставілі абвінавачванне па эканамічным артыкуле.

"Тыя працэдуры, якія прадугледжаныя ўнутраным рэгламентам і беларускім заканадаўствам, усе структуры, якія працавалі ў Беларусі, працуюць па наладжанай схеме сувязяў, таму ў нас няма вялікай праблемы ў разрыве гэтых сувязяў", — кажа Вадзім Саранчукоў.

Як вядома, улады Беларусі рыхтуюць перарэгістрацыю партый. На сённяшні дзень зарэгістраваныя паўтара дзясятка партый, аднак апазіцыйныя структуры пад рознымі падставамі могуць "зачысціць".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.