Наркотыкі, стронцый, смерць спартсмена ― расследаванні Еўрарадыё ў 2013-ым

Напрыканцы лютага ў алімпійскім комплексе “Стайкі” памёр перспектыўны 19-гадовы шангіст Яўген Шрамко. У хлопца спынілася сэрца.

Трагедыя здарылася на фоне вострага крызісу ў беларускім спорце: правал здарыўся не толькі ў выніках, але і ў падрыхтоўцы рэзерва, у фармакалагічным забеспячэнні, медыцыне.  

Мачулішчанскі аддзел міліцыі правёў паспешлівую  “праверку”, па выніках якой ніхто ў смерці Яўгена Шрамко вінаватым не аказаўся.

Еўрарадыё засумнявалася ў такой версіі і пачало шукаць інфармацыю, якая б патлумачыла смерць цяжкаатлета, які лічыўся абсалютна здаровым.

Аказалася, што напярэдадні смерці Яўген скардзіўся блізкаму сябру на дрэннае самаадчуванне і высачэзны ціск, распавядаў пра паход да ўрача і жменю таблетак.

Пракуратура Мінскага раёна, даведаўшыся пра гэтыя факты, пастанавіла праводзіць новую праверку, якая цягнецца дагэтуль.

У студзені 2014-га года мы даведаемся, ці будзе ўзбуджана крымінальная справа па факце смерці маладога цяжкаатлета. Цалкам верагодна, што следчыя здолеюць выкрыць важныя сістэмныя хібы ўсяго беларускага спорту.

***

У канцы красавіка напярэдадні 27-й гадавіны Чарнобыльскай катастрофы Еўрарадыё выправілася ў вёску Пяршаі, дзе асела радыяцыйная пляма.  Вёска знаходзіцца ў 40 хвілінах ад сталіцы на аўто.

У мясцовых жыхароў мы набылі бульбу і малако. Потым у адной з самых сучасных лабараторый краіны праверылі прадукты на наяўнасць радыёнуклідаў.

Бульба нечакана паказала шматразовае перавышэнне па…стронцыі, які па ідэі не мог пакінуць 30-кіламетровую зону адчужэння і трапіць у цэнтральную Беларусь. Пазней Мінскі гарадскі цэнтр гігіены і эпідэміялогіі  таксама выявіў перавышэнне па стронцыі ў гэтай бульбе.

Матэрыялы Еўрарадыё выклікалі крытыку з боку навукоўцаў. Прадукты харчавання ў Пяршаях нібыта пераправяралі і не знаходзілі ў іх праблемаў са стронцыем (хоць паспрабуй правер гэтыя вымярэнніJ).

Аднак самае абуральнае было наперадзе.

Цягам журналісцкага следства высветлілася, што новы тэхрэгламент мытнага саюза склалі цераз пень-калоду. І зашкальванне па стронцыю ў бульбе з Пяршаяў стала ўпісвацца ў норму.

Паводле інфармацыі Еўрарадыё, наш Урад звярнуў увагу на праблему, і ў дадзены момант складаецца асаблівая беларуская пазіцыя па “стронцыевым пытанні”. З вялікай доляй верагоднасці ў нашу краіну вернуцца старыя жорсткія нормы па стронцыі, так званыя РДУ-99.

***

У лістападзе на Еўрарадыё выйшла расследаванне пра тое, як лёгка ў Беларусі купіць забруджаны опіем мак (так званыя “бубкі”) і прыгатаваць з гэтай субстанцыі наркотык, горшы за гераін.

У некаторых беларусаў зводкі з нашых  наркатычных прытонаў выклікалі шок і непаразуменне.

Як магло так стацца, што ў Беларусі напладзілася каля 150 тысяч ін’екцыйных наркаспажыўцоў?  Чаму заканадаўства складзена такім чынам, што макавыя дылеры ў Беларусі аказаліся абароненымі трайной бранёй (гандлююць забруджаным насеннем і праз рынкі, і праз наркатаксі)а колькасць наркаспажыўцоў няўхільна расце і штодня б’е гістарычныя рэкорды?

У снежні Еўрарадыё атрымала ліст з Адміністрацыі прэзідэнта, дзе паведамлялася, што антымакавы Дэкрэт рыхтуць на даклад Аляксандру Лукашэнку. “Бубкі” паўлегальна распаўсюджваюць у Беларусі з 2004-га года. І вось з’явіўся шанц спыніць гэта бязладдзе.