Лукашэнку з Масквы прывязуць часопіс, які адмовіліся прадаваць у Беларусі

Як інфармавала Еўрарадыё, "Белсаюздрук" адмовіўся згаданы нумар распаўсюджваць (снежаньскі нумар у распаўсюд ужо трапіў). Найхутчэй, адмова звязаная з публікацыяй на вокладцы амерыканскай карыкатуры 1939 года "Вяселле Гітлера і Сталіна", на якой прысутнічала свастыка.

Галоўны рэдактар радыё "Эхо Москвы" і заснавальнік праекта “Дилетант” Аляксей Венедыктаў у нядаўняй праграме "Будзем назіраць" паведаміў, што запланаванае яго інтэрв'ю з Аляксандрам Лукашэнкам, якое не адбылося ў пачатку снежня з-за паездкі беларускага кіраўніка ў Сочы, прызначана на 23 снежня (альбо на 26 снежня).

Венедыктаў: "Я паеду і абавязкова адвязу Аляксандру Рыгоравічу і яго Адміністрацыі гэты нумар ["Дилетанта"]".

Інтэрв'ю з Лукашэнкам мусіць адбыцца ўжо пасля сустрэчы ў Санкт-Пецярбургу кіраўнікоў Беларусі і Расіі, прысвечанай пытанням "паглыблення інтэграцыі".