Лукашэнка нарэшце ўручыў ордэн Дружбы народаў Рамзану Кадыраву

Аляксандр Лукашэнка ўручыў кіраўніку Чачэнскай рэспублікі Рамзану Кадыраву ордэн Дружбы народаў, перадае БелТА. Узнагарода амаль год чакала свайго героя. Указ аб узнагароджанні быў падпісаны яшчэ ў жніўні 2018 года, але ўручыць ордэн змаглі толькі цяпер. Ордэн Дружбы народаў — найвышэйшая ўзнагарода Беларусі для замежных грамадзян.

Кіраўнік Чачэнскай рэспублікі прыбыў у Мінск, каб прысутнічаць на цырымоніі адкрыцця II Еўрапейскіх гульняў. Напярэдадні мерапрыемства прайшла сустрэча Кадырава з Аляксандрам Лукашэнкам, дзе і адбылося ўручэнне ордэна.

"Да цябе ў нас стаўленне асаблівае. Рамзан, дзякуй табе за тое, што ўмееш трымаць слова. Я заўсёды кажу: ён сапраўдны мужык: паабяцаў — зрабіў. Дзякуй за нашых людзей, якіх мы наўрад ці б убачылі ў Беларусі, якіх ты вызваліў. Ты сапраўды не проста сябар — ты брат для мяне, для нашага народа. Тое, што я хачу табе сёння ўручыць ордэн Дружбы, — гэта, павер, мае асаблівае гучанне. Гэта не нейкая палітычная мода. Ты сапраўды заслужыў як чалавек, які прынёс нашаму народу, а не толькі асобным людзям, вялікае шчасце. А для мяне гэта велізарны падарунак".

Як паведамляецца, Рамзан Кадыраў удастоены гэтай узнагароды за значны асабісты ўклад ва ўмацаванне дружалюбных адносін і ўсебаковага супрацоўніцтва з Беларуссю. Лічыцца, што Рамзан Кадыраў унёс асабісты ўклад у вызваленне грамадзян Беларусі з лівійскага палону.