Вы тут

Кісларод, ахова і 250 мяшкоў для памерлых: як лякарні закупляюцца ў каранавірус

Лякарні купляюць буйныя аб'ёмы кіслароду / Еўрарадыё

Рэчыцкая цэнтральная раённая бальніца абвясціла тэндары на закупку ста ахоўных экранаў для твару, 50 аднаразовых кантэйнераў для аспірату дыхальных шляхоў (аспірат — доследны матэрыял з дыхальных шляхоў), 10 набораў тэст-сістэм ІФА (для аналізаў на антыцелы) і 250 пакетаў для памерлых.

Відавочна, пакупкі звязаныя з каранавірусам. Вядома, лякарні павінны быць забяспечаныя ўсім неабходным, але бянтэжаць 250 пакетаў для памерлых.

Закупка Рэчыцкай цэнтральнай бальніцы / goszakupki.by

Еўрарадыё датэлефанавалася да галоўнага доктара Рэчыцкай цэнтральнай раённай бальніцы, каб даведацца, ці незвычайныя такія аб'ёмы закупак і наколькі часта людзі паміраюць у лякарні.

— Нічога не ведаю пра закупкі, не магу вам сказаць, — адказвае галоўны доктар.

Як паведаміў медык з Мінска, 250 пакетаў для памерлых усё ж зашмат для Рэчыцы ў канцы года.

— Звычайна на пачатку года выдаюць гадавую патрэбу, — адзначае наш суразмоўца.

Мяркуючы па сайце дзяржзакупак, пакупкі, якія могуць быць звязаныя з каранавірусам, ёсць не толькі ў Рэчыцы. Напрыклад, Полацкая цэнтральная гарадская бальніца купляе 60 тысяч кубоў медыцынскага кіслароду на 277,2 тысячы рублёў.

6-я гарадская клінічная бальніца Мінска абвясціла тэндар на 15 канцэнтратараў кіслароду на 51 тысячу рублёў.

Пінская цэнтральная бальніца закупляе 195 тон вадкага медыцынскага кіслароду на 86 тысяч рублёў.

Як паведамляла Мінздароўя, у сувязі з пандэміяй каранавіруса з 9 кастрычніка для ўсіх абавязкова насіць маскі ў грамадскіх месцах і выконваць сацыяльную дыстанцыю.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.