Грамадзян, якія заплацілі падаходны падатак, залічылі ў дармаеды
![Грамадзян, якія заплацілі падаходны падатак, залічылі ў дармаеды](/sites/default/files/styles/gallery_main/public/2023-08/zhyrouka-0312.jpg.webp?itok=VU1qVwf2)
Грамадзянаў Беларусі, якія плацяць штогадовы падаходны падатак, уключылі ў базу незанятых у эканоміцы, паведамляе Радыё "Свабода". У ранейшым дэкрэце тыя, хто плаціў падаходны падатак, у гэты лік не траплялі.
Гэтую інфармацыю журналістам пацвердзіла прэс-сакратар Міністэрства працы і сацыяльнай абароны Вольга Шцін. Яна не патлумачыла, чаму грамадзяне, якія заплацілі падатак, трапілі ў базу дармаедаў і колькі іх усяго.
У ранейшым дэкрэце №3 ад "дармаедскага" збору вызваляліся тыя, хто заплаціў:
падаходны падатак з фізічных асобаў;
адзіны падатак з індывідуальных прадпрымальнікаў і іншых фізычных асобаў;
падатак пры спрошчанай сістэме падаткаабкладання ў памеры не менш як 20 базавых велічыняў;
збор за рамесніцкую дзейнасць;
збор за паслугі ў сферы агратурызму.
Цяпер, паводле пастановы Саўміна, занятымі ў эканоміцы лічацца:
індывідуальныя прадпрымальнікі і фізічныя асобы, якія плацяць адзіны падатак;
рамеснікі, якія плацяць збор за рамесніцкую дзейнасць;
грамадзяне, якія здаюць у наём жылыя і нежылыя памяшканні, машынамесцы (пры ўмове выплаты падаходнага падатку з фізічных асобаў ад такога даходу).
Па словах міністра працы і сацыяльнай абароны Ірыны Касцевіч, у базу "дармаедаў" унесеныя 500 тысяч жыхароў Беларусі.