Гледачы Венецыянскага кінафэсту пабачаць прыгоды Femen у Беларусі (відэа)

Кінастужка паказвае гісторыю руху Femen ва Украіне да моманту трансфармацыі яго ў міжнародны.

У каментары Еўрарадыё лідарка руху Ганна Гуцол паведаміла, што ўвайшоў у фільм і сюжэт пра мінскую акцыю 19 снежня 2011 года. Нагадаем, што тады актывісткі арганізацыі зладзілі акцыю проста на прыступках КДБ.

Гуцол: "Кіці Грын разам з намі была ў Мінску, разам з намі была выкрадзеная КДБ. У сэнсе, дзяўчаты былі выкрадзеныя асобна, а Кіці правяла ўвесь дзень у КДБ, у яе забралі карты з акцыі. Ёй пагражалі, а потым дэпартавалі ў Літву. Яна была ўдзельніцай падзеяў. Ёй удалося аднавіць матэрыял з картаў — акцыю пад КДБ у Мінску. І абавязкова гэтыя кадры будуць уключаныя ў фільм".

Нагадаем, што ў інтэрнэце адзіны відэаролік з акцыі Femen каля КДБ абнародавала Еўрарадыё.

70-ы Венецыянскі кінафэст пройдзе з 28 жніўня па 7 верасня. Яго журы ўзначальвае легендарны рэжысёр Бернарда Берталучы.

Фота — femen.org