Галасаванне ў парламенце Вялікабрытаніі па "брэксіце" пройдзе ў 2019 годзе
![Галасаванне ў парламенце Вялікабрытаніі па "брэксіце" пройдзе ў 2019 годзе](/sites/default/files/styles/gallery_main/public/2023-08/2018-12-17t152135z_2129575683_rc164ae0bbd0_rtrmadp_3_britain-eu.jpg.webp?itok=ycf9hvWL)
Галасаванне ў парламенце Вялікабрытаніі па "брэксіце" пройдзе ў 2019 годзе пасля святаў. Пра гэта паведаміла прэм'ер-міністр Тэрэза Мэй. Раней яно было прызначанае на 11 снежня, але напярэдадні было перанесенае. Мэй патлумачыла рашэнне тым, што большасць дэпутатаў не гатовыя прагаласаваць за выніковае пагадненне аб выхадзе Вялікабрытаніі з ЕС.
Як інфармуе "Бі-Бі-Сі", прэм'ер-міністр адзначыла, што абмеркаванне ў парламенце адновіцца з 7 студзеня 2019-га, а на наступным тыдні пройдзе галасаванне. Мэй падкрэсліла, што яна супраць правядзення паўторнага рэферэндума па "брэксіце". Вялікабрытанія выходзіць з ЕС у адпаведнасці з вынікамі рэферэндума 23 чэрвеня 2016 года (нечакана амаль 52% прагаласавалі за выхад з Еўрасаюза). Паводле праекта аб пагадненні з ЕС здарыцца гэта мусіць 29 сакавіка 2019 года.