Дзмітрый Мядзведзеў назваў землятрус у Алматы "Божым сігналам" для Беларусі
![Дзмітрый Мядзведзеў назваў землятрус у Алматы "Божым сігналам" для Беларусі](/sites/default/files/styles/gallery_main/public/2023-08/miadzved-0202.jpg.webp?itok=f-SqpOjA)
Падчас пасяджэння міжурадавай камісіі Еўразійскага эканамічнага саюза (ЕАЭС) ў Алматы адбыўся невялікі землятрус. Ён стаў нагодай для жарту расійскага прэм'ера Дзмітрыя Мядзведзева, паведамляе РБК.
"Паважаныя калегі, мы з вамі падпісалі ўсе дакументы. Наша сённяшняя сустрэча прайшла ў цёплай абстаноўцы, суправаджалася нязначным землятрусам. Як справядліва мае калегі кажуць, землятрус адбыўся ў момант разгляду пастановы нумар 666 Савета міністраў Рэспублікі Беларусь. Гэта для ўсіх для нас урок, а для Рэспублікі Беларусь — знак, сігнал Божы", — сказаў кіраўнік расійскага ўраду.
Мядзведзеў удакладніў, што гаворка ідзе пра пастанову, якая ўводзіць абмежаванні для міжгранічнага перамяшчэння тавараў. "Мой беларускі калега досыць пераканаўча тлумачыў, для чаго такія рашэнні былі прынятыя: каб усякую дрэнь на рынак не цягнулі. І гэта ўсё правільна, але, з іншага боку, гэта абмежаванне", — дадаў расійскі прэм'ер.
Землятрус у Алматы адбыўся ў пятніцу, 2 лютага, каля 12:20 паводле мінскага часу. Яго магнітуда склала 3,7 бала.