Як вядома, колькасць прызыўнікоў няўхільна зніжаецца, а 80% з іх вызваляецца ад службы ў войску для працягу адукацыі. Лукашэнка заявіў на нарадзе, што Саўмін падрыхтаваў праект дакумента аб узмацненні адказнасці за ўхіленне ад службы.
Па выніках нарады міністр абароны Андрэй Раўкоў паведаміў, што па прапановах былі прынятыя станоўчыя рашэнні. Толькі ў шэрагу выпадкаў будуць удакладняць "некаторыя пытанні з юрыдычнага боку". Новаўвядзенні вырашылі рэалізоўваць у два этапы. Спачатку будзе наводзіцца парадак "на ўсіх узроўнях" — у школах, дзе ёсць урокі дапрызыўной падрыхтоўкі, у ваенкаматах, у якіх працуюць медкамісіі, і нарэшце ў войску ўвогуле. Адначасова распрацуюць меры па барацьбе з ухілістамі. Як інфармуе БЕЛТА, да восені пра вынікі гэтай працы паведамяць кіраўніку дзяржавы.
Што да другога этапу, то падчас яго будуць перагледжвацца правілы прызыву на тэрміновую службу ў войска. На сённяшні дзень існуюць 47 адтэрміновак і іх колькасць могуць скараціць. Мяркуецца, што адтэрміноўку для адукацыі можна будзе атрымаць толькі адзін раз. Важная задача — зацікаўленне маладых людзей службай у беларускай арміі. Ужо ёсць прапановы, якія збіраюцца выкарыстоўваць паступова. На нарадзе гаворка ішла пра тое, што кардынальных зменаў не плануецца.
Па словах Раўкова, людзі, якія адслужылі ў войску, змогуць бясплатна прайсці падрыхтоўчыя курсы для паступлення ў ВНУ. У іх будзе прыярытэт пры паступленні пра роўных балах з тымі, хто не служыў, пры атрыманні жылля ў інтэрнаце. Раней міністр абароны ўжо выказваўся на гэтую тэму, ён згадваў і перавагу пры размеркаванні.