Беларусь засталася адзінай краінай, дзе "дыстанцыйка" забароненая — педагог

29/08/2022 - 09:41

Дыстанцыйная адукацыя ў школе / unsplash

Дыстанцыйная адукацыя ў школе / unsplash

"Адмова ад дыстанцыйнай адукацыі — гэта спроба схаваць правал праграмы "Электронная школа", — піша ў сябе ў фэйсбуку вядомы беларускі рэпетытар Яўген Лівянт.

Педагог апублікаваў свае разважанні пра дыстанцыйную адукацыю ў Беларусі напярэдадні пачатку новага навучальнага года. Еўрарадыё публікуе меркаванне Лівянта.

Для пераходу на "дыстанцыйку" нічога не зроблена

Беларусь осталась единственной страной, где "дистанционка" запрещена — педагог

Мы памятаем, як ад нас хавалі чарнобыльскую аварыю і наступствы гэтай аварыі, таму што ўлады не ведалі, што рабіць. Але цяпер жа мы ведаем, што ў выпадку радыеактыўнага заражэння праз баявыя дзеянні вакол Запарожскай АЭС школьнікі і настаўнікі застануцца дома. Мы разумеем, што гэтая трагедыя можа адбыцца сёння, заўтра — у любы дзень. Мы бачым, што баявыя дзеянні на тэрыторыі Украіны толькі ўзмацняюцца. І мы нават не ўяўляем, у што яны могуць выліцца, як гэтая сітуацыя будзе развівацца далей. Відавочна, нельга выключаць, што баявыя дзеянні з тэрыторыі Украіны могуць перакінуцца і на нашу краіну.

І ў гэтым выпадку мы непазбежна павінны былі б перайсці на дыстанцыйную сістэму адукацыі. Але для гэтага пераходу нічога не зроблена, нашы дзяржаўныя структуры не гатовыя і нават не спрабуюць рыхтавацца да такога развіцця падзей.

Дый гісторыя з кавідам хіба ўжо скончылася? Калі ўсе вернуцца з адпачынкаў і дзеці прыйдуць у школу, нас непазбежна чакае ўсплёск захворванняў на кавід, пра што Міністэрства аховы здароўя нас ужо папярэдзіла. Мы ведаем, што ў Еўропе некаторыя краіны зноў пераходзяць на масачны рэжым і дыстанцыйнае навучанне. У Расіі з гэтай жа прычыны 1 верасня не будзе лінеек.

Спроба схаваць правал

Я шмат думаў пра прычыны незразумелага ірацыянальнага непрымання дыстанцыйнага навучання Міністэрствам адукацыі і прыйшоў да высновы, што галоўная прычына гэтага непрымання — спроба схаваць поўны правал праграмы "Электронная школа — 2020". Тое, што гэтая праграма цалкам правалена, стала зразумела вясной 2020 года, калі 3 і 4 навучальныя чвэрці былі, па сутнасці, цалкам сарваныя праз абсалютную негатоўнасць сістэмы адукацыі да дыстанцыйнага навучання ў часе пандэміі. Выявілася, што школы не гатовыя перайсці на "дыстанцыйку", бо няма неабходнай тэхнікі, сетак, праграмнага забеспячэння, арганізацыйных магчымасцяў, а педагогі не ўмеюць працаваць дыстанцыйна.

Здавалася б, здаровы сэнс узяў верх, і ў жніўні 2021 года на Рэспубліканскім педсавеце кіраўніцтву краіны і настаўнікам ранейшым міністрам адукацыі [Ігарам Карпенкам, цяпер старшыня ЦВК. — Еўрарадыё] была прадстаўлена адзіная адукацыйная платформа, але хутка высветлілася, што гэты партал быў пустышкай, "пацёмкінскай вёскай", які такім застаецца і да гэтага дня.

Пасля гэтага прайшоў яшчэ год, але нічога не змянілася, акрамя таго, што новая рэдакцыя Кодэкса аб адукацыі забараніла дыстанцыйнае навучанне ў сярэдніх школах. Чаму? Усе грошы на праект "Электронная школа", мабыць, былі ўжо паспяхова асвоеныя, і на паперы, але не ў рэальнасці, ужо ўсё існуе: тэхніка, сеткі, серверы, праграмы, а настаўнікі паспяхова авалодалі методыкай дыстанцыйнага навучання. Каб схаваць гэты правал, Міністэрства адукацыі і пачало кампанію па дыскрэдытацыі дыстанцыйнай адукацыі, тлумачачы яе непатрэбнасць і нават шкоднасць. Ніякага іншага лагічнага тлумачэння гэтага абсурду я прыдумаць не магу.

Дзяржорганы не дапамагаюць, а перашкаджаюць

Развіццё дыстанцыйнага адукацыі прыватнымі структурамі таксама сустракае процідзеянне дзяржаўных органаў. Нядаўна паспрабавалі зачыніць дыстанцыйную школу "Прайм". Пры гэтым танальнасць навін была такая, як быццам накрылі нейкі прытон або прадпрыемства, якія займаюцца злачынным бізнесам. Магчыма, ім паставяць у віну навучанне матэматыцы і іншым школьным прадметам у асабліва буйных памерах. Ну давайце прыкрыем на старце ўсе беларускія прыватныя ініцыятывы. У "Прайм" пракуратура прыехала — выдатна! Але наша пракуратура і наша Міністэрства адукацыі прыйдуць і "накрыюць" і расійскія дыстанцыйныя школы?

У Расіі сістэма дыстанцыйнай адукацыі — і дзяржаўнай, і прыватнай — інтэнсіўна развіваецца. Розныя формы — завочная, дыстанцыйная, сямейная — гэта я ўсё пра школу кажу, велізарная колькасць навучальных устаноў, якія паспяхова функцыянуюць і рэкламуюцца тут. Значыць, нашы школьнікі і бацькі, якія выбралі для сваіх дзяцей дыстанцыйную адукацыю, скажуць: "Вельмі шкада, што беларускіх няма, будзем вучыцца ў расійскай школе". Я думаю, што хутка да нас прыйдуць прыватныя дыстанцыйныя сістэмы і іншых краін, іх перавядуць на рускую мову, а нашых школ не будзе. Ужо прыдумана і як вучыць, і як атрымліваць аб'ектыўныя вынікі навучання, і як кантраляваць дыстанцыйны навучальны працэс, калі вочнае навучанне з тых ці іншых прычын немагчымае.