Зарад патрыятызму: як цяпер школьнікаў будуць шпігаваць ідэалогіяй

12/08/2022 - 11:51

"Зараджаныя на патрыятызм" школьнікі / "СБ"

"Зараджаныя на патрыятызм" школьнікі / "СБ"

У новы навучальны год беларускія школы ўвойдуць не толькі з новымі элементамі формы і абноўленымі праграмамі, але і свежымі рэкамендацыямі па ідэалагічным выхаванні. Што чыноўнікі падрыхтавалі для дзяцей?

Сцягі, трэба больш сцягоў

Адным з першых і ключавых пунктаў у рэкамендацыях Мінадукацыі адзначае "фармаванне ў навучэнцаў паважлівага стаўлення да дзяржаўнай сімволікі".

Так, зацверджаны адзіныя дні правядзення "рытуалаў ушанавання дзяржаўнай сімволікі" — у іх павінны прымаць удзел усе навучэнцы. Яшчэ чыноўнікі прапануюць ладзіць урачыстыя цырымоніі ўнясення і вынасу дзяржаўнага сцяга, а ў кожнай школе для гэтага стварыць "сцягавую групу".

Генацыд і вайна

У кантэксце "Года гістарычнай памяці", які працягваецца, беларускія чыноўнікі патрабуюць, каб у кожнай школе з'явіліся музеі або музейныя пакоі.

Яны павінны расказваць у першую чаргу гісторыі Вялікай Айчыннай вайны і паведамляць пра "генацыд беларускага народа", чаму ў апошнія два гады аддаюць вялікую ўвагу пракуроры і прапагандысты.

Канстытуцыя і метадычкі

Патрабуюць у Мінадукацыі "актывізаваць працу па ваенна-патрыятычным выхаванні".

Адзін з ключавых дапаможнікаў для такога "выхавання" — абноўленая кніга "Гонар за Беларусь", якую напісаў дзяржаўны "сацыёлаг" Сяргей Мусіенка, а рэдактарамі выступілі галоўны рэдактар газеты "Беларусь сегодня" Дзмітрый Жук і яго супрацоўнік Максім Осіпаў.

Будуць расказваць школьнікам і пра змены ў Канстытуцыі, якія набылі моц 15 сакавіка.

Барацьба за інтэрнэт

Яшчэ ў спісе таго, што чыноўнікі патрабуюць актывізаваць, — "дзейнасць па папярэджанні негатыўнага ўплыву на навучэнцаў размешчанай у сетцы Інтэрнэт і СМІ інфармацыі".

Настаўнікі павінны будуць вучыць дзяцей выяўляць фэйкі (дакладней, тое, што дзяржава такімі лічыць) і выконваць меры бяспекі ў інтэрнэце — напрыклад, ведаць, якую інфармацыю нельга адно аднаму перасылаць.

Плануецца займаць дзяцей і ўсе школы, каб яны праводзілі больш часу па-за інтэрнэтам. Акрамя прапаганды піянерыі і БРСМ, чыноўнікі прапануюць "адраджаць традыцыі дваровых гульняў" — напрыклад, "казакоў-разбойнікаў". У суботы школьнікаў павінны будуць вадзіць у "кіналекторыі" і на тэматычныя паказы фільмаў "на патрыятычную тэматыку".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.