Беларусь першай атрымае новую эксперыментальную нафту з ЗША

У чацвер з порта Бомонт ў Тэхасе адправіўся танкер з першай у гісторыі партыяй сырой нафты WEB. Гэта другі танкер з ЗША для беларускіх нафтаперапрацоўчых заводаў. У пачатку жніўня танкер павінен прыбыць у порт Клайпеды. Дзякуючы таму, што у новага гатунка падобныя параметры з расейскай нафтай URALS — перапрацоўваць WEB будзе нашмат прасцей.

Кантракт на пастаўку нафты з беларускім дзяржаўным нафтавым холдынгам "Белнафтахім" быў падпісаны амерыканскай кампаніяй 3Seas Energy, акцыянерамі якой з'яўляюцца кампаніі Unimot і Getka. Назва гэтай кампаніі прамая адсылка да ідэі "Ініцыятывы трох мораў" ці Інтэрмарыўма — плана па ўмацаванні эканамічнага, энергетычнага і інфраструктурнага супрацоўніцтва паміж краінамі Цэнтральнай Еўропы, размешчанымі паміж Балтыйскім, Адрыятычным і Чорным марамі.

У лютым гэтага года кіраўнік амерыканскай дыпламатыі Майк Пампея падчас свайго візіту ў Мінск паабяцаў Аляксандру Лукашэнку, што ЗША дапамогуць задаволіць попыт Беларусі на нафту. У той час пастаўкі "чорнага золата" з Расеі былі абмежаваныя.