Беларусь можа закрыць дыппрадстаўніцтва Украіны ў Мінску
Кіеў, фота ілюстрацыйнае
Беларусь можа закрыць дыппрадстаўніцтва Украіны ў Менску, піша БелТА са спасылкай на прэс-службу Міністэрства замежных спраў.
Беларускі МЗС выклікаў часовую павераную ў справах Украіны Вольгу Цімуш. Дыпламату перадалі ноту пратэсту "ў сувязі з парушэннем мяжы Рэспублікі Беларусь групай беспілотных лятальных апаратаў, запушчаных з тэрыторыі Украіны".
"Асабліва было ўказана на тое, што калі дыпламатычнае прадстаўніцтва Украіны ў Беларусі не зможа ўплываць на прадухіленне такіх правакацый, беларускім бокам будзе пастаўлена пытанне аб мэтазгоднасці яго далейшай прысутнасці ў Мінску", — сказалі ў МЗС.
Пра тое, што ўкраінскія беспілотнікі парушылі паветраную прастору Беларусі, заявіў у суботу, 10 жніўня, Аляксандр Лукашэнка. Пазней Мінабароны Беларусі заявіла аб планах перакінуць у памежныя з Украінай рэгіёны рэактыўныя сістэмы "Паланэз" і комплексы "Іскандэр".
Ва ўкраінскім Савеце нацыянальнай бяспекі і абароны пракаментавалі гэтыя дзеянні беларускага боку. Там лічаць заявы беларускіх чыноўнікаў спробай адцягнуць увагу Кіева і справакаваць перакідку ўкраінскіх войскаў для дадатковай абароны мяжы з Беларуссю.
