Апублікаваны дэкрэт №8 "Аб развіцці лічбавай эканомікі"

Дэкрэт №8 складаецца з 17 пунктаў і 4 прыкладанняў. Ім да 1 студзеня 2049 года падаўжаецца дзеянне спецыяльнага прававога рэжыму Парку высокіх тэхналогій; ствараюцца ўмовы для ўкаранення ў эканоміку Беларусі блакчэйна і іншых тэхналогій, "заснаваных на прынцыпах размеркавання, дэцэнтралізацыі і бяспекі аперацый, што здзяйсняюцца з іх выкарыстаннем"; даюцца льготы і прэферэнцыі ўдзельнікам адносінаў, звязаных з ужываннем гэтых тэхналогій, і прымаюцца меры для павышэння іх прававой абароненасці. Таксама дэкрэт прадугледжвае правядзенне ў рамках ПВТ "прававога эксперыменту" для апрабацыі інстытутаў англійскага права "на прадмет магчымасці іх імплементацыі ў грамадзянскае заканадаўства Рэспублікі Беларусь".

Першае прыкладанне дэкрэта №8 — гэта пералік тэрмінаў, якія ў ім выкарыстоўваюцца. Другое ўключае пералік зменаў, якія ўносяцца ў нарматыўныя прававыя акты. Трэці дадатак — гэта палажэнне аб Парку высокіх тэхналогій. Чацвёртае вызначае межы ПВТ у рамках мінскіх вуліц Купрэвіча, Русіянава, Францыска Скарыны, Праграмістаў і Мінскай кальцавой аўтамабільнай дарогі.