Ад укусаў кляшчоў пацярпелі ўжо больш за 1400 беларусаў

Ад укусаў кляшчоў пацярпелі ўжо больш за 1400 беларусаў

Па меддапамогу пасля ўкусаў кляшчоў сёлета звярнуліся ўжо больш за 1400 чалавек. Такую лічбу назваў загадчык аддзела эпідэміялогіі Рэспубліканскага цэнтра гігіены, эпідэміялогіі і грамадскага здароўя Уладзімір Пашковіч, піша sb.by.

Спецыяліст паведаміў, што кляшчы актывізуюцца пасля таго, як тэмпература паветра пераадольвае адзнаку +5 градусаў.

"Сёлета ў нас крыху ссунуўся пачатак клешчавога сезона. У сакавіку было 23 звароты — толькі 4% да ўзроўню мінулага года. Але за красавік мы маем ужо больш за 1400 зваротаў, што на 4% ніжэй, чым летась. Гэта значыць, мы ўжо практычна дагналі мінулы год па зваротах", — канстатаваў эксперт.

Каля 60% укусаў кляшчоў фіксуюць у сельскай мясцовасці.

У Беларусі кляшчы перадаюць дзве інфекцыі — хваробу Лайма і клешчавы энцэфаліт. За год у сярэднім у нашай краіне рэгіструюць каля 130 выпадкаў клешчавога энцэфаліту і каля 1600 выпадкаў хваробы Лайма. Праўда, рызыка захварэць пасля ўкусу кляшча не вельмі высокая: толькі адзін з 350 укусаў заканчваецца клешчавым энцэфалітам і адзін з 25 — хваробай Лайма.

Дарэчы, клешчавы энцэфаліт перадаецца таксама праз малако — у першую чаргу казінае. Летась было зарэгістравана пяць такіх выпадкаў у Гродзенскай і Мінскай абласцях. Тут абарону можа забяспечыць кіпячэнне малака.

Апошнія навіны

Галоўнае

Выбар рэдакцыі