204 выпадкі адру зарэгістравана ў Беларусі — Мінздароўя
Адзёр, ілюстрацыйнае фота / cmei.com.ua
На сёння ў Беларусі зарэгістравана 204 выпадкі адру. Такую лічбу назваў намеснік міністра аховы здароўя — галоўны дзяржаўны санітарны лекар Аляксандр Тарасенка.
Больш за ўсё такіх выпадкаў зарэгістравана ў Брэсцкай вобласці — 62% ад агульнай колькасці. Другое месца займае Магілёўская вобласць з 16%, на трэцім месцы ідзе Гродзенская.
"У Брэсцкай вобласці сітуацыя па адру звязаная ў тым ліку з рэлігійнымі суполкамі. Гаворка ідзе пра заўзятых адмоўнікаў ад вакцынацыі", — цытуе словы Тарасенкі прэс-служба Мінздароўя.
43% хворых — гэта дзеці ад 7 да 17 гадоў, а 30% — людзі ад 18 да 40 гадоў.
Гаворачы пра выпадак адру, зарэгістраваны ў Лідскім раёне, лекар заявіў, што гэта чалавек, які прыехаў з суседняй вобласці. "Так як ён кантактаваў з 15 людзьмі, то зараз усе яны зарэгістраваныя як кантакты з захварэлым. У сувязі з тым, што захворванне вельмі кантагіёзнае, усе гэтыя пацыенты з падазрэннем на адзёр шпіталізаваныя ў інфекцыйнае аддзяленне раённай бальніцы", — тлумачыць Тарасенка.
