ЗША адказалі санкцыямі на "завочныя суды" ў Беларусі

ЗША ўводзяць санкцыі супраць 25 прадстаўнікоў беларускага рэжыму — чыноўнікаў і дэпутатаў Палаты прадстаўнікоў. Пра гэта заявіў дзяржсакратар ЗША Энтані Блінкен, піша Reuters.

Прычынай санкцый называюцца "завочныя суды" над праціўнікамі рэжыму, у тым ліку Святланай Ціханоўскай. Такія суды, заявіў дзяржсакратар, падрываюць дэмакратыю ў краіне.

Па словах Блінкена, пад візавыя абмежаванні трапілі тыя, хто прыняў удзел ва ўвядзенні смяротнага пакарання ў Беларусі для асоб, асуджаных за "тэрарызм".

"Мы не застанемся ўбаку, бо гэты рэжым працягвае пераследаваць і рэпрэсаваць мірных дэманстрантаў, дэмакратычную апазіцыю, журналістаў, актывістаў, праваабаронцаў і звычайных беларусаў", — заявіў дзяржсакратар ЗША.

Імёны тых, хто трапіў пад санкцыі, пакуль не называюцца.