Удзельнікі Канвенцыі Эспа не дамовіліся па Астравецкай АЭС

Дэлегаты 7-й Нарады бакоў Канвенцыі Эспа, якая праходзіць у Мінску, не змаглі прыйсці да адзінага меркавання па пытаннях, звязаных з ядзернай энергетыкай. Краіны-ўдзельніцы канвенцыі вернуцца да абмеркавання рэкамендацый па Беларускай АЭС і іншых праектах праз год. Пра гэта Еўрарадыё паведамілі некалькі крыніц, знаёмых з ходам абмеркаванняў.

Рашэнне, якое будзе запісана ў "Мінскай дэкларацыі" — выніковым дакуменце сесіі — аформлена, але яшчэ не зацверджана на агульным пасяджэнні.

Ія Малкіна, першая намесніца міністра прыроды Беларусі, не кранаючыся сутнасці рашэння, адзначае, што яно будзе распаўсюджана не толькі на Астравецкую АЭС: "Цягам экспертнага абмеркавання было дасягнута разуменне, што сёння недастаткова тых механізмаў — канвенцый, якія існуюць — для таго, каб у поўным аб'ёме вырашаць спрэчкі. І гэта не толькі беларуска-літоўскі пытанне. Ёсць пытанні з боку Азербайджана, Вялікабрытаніі, Украіны".

"Мы працягваем прапаноўваць літоўскім калегам паўнавартасны дыялог. Мне хацелася б, каб асцярогі, якія вы выказалі аб эканамічным складніку праекта [напярэдадні міністр прыроды Літвы заявіў, што яго мэта — зрабіць АЭС у Астраўцы эканамічна немэтазгоднай, што падштурхнула б Беларусь да згортвання будаўніцтва. — Еўрарадыё], не былі пацверджаныя на далейшых стадыях супрацоўніцтва. Калі б мы толькі імкнуліся нашкодзіць нашай суседцы, напэўна, мы б дзейнічалі некалькі інакш", — дадала Ія Малкіна, адказваючы на ​​пытанне аб жорсткай пазіцыі літоўскіх палітыкаў і рашэнні Сейма аб аднясенні Астравецкай АЭС да пагроз нацыянальнай бяспекі Літвы.

Выніковы дакумент 7-й Нарады бакоў Канвенцыі Эспа будзе зацверджаны ў бліжэйшыя гадзіны.