Шыльду да 100-годдзя БНР павесілі ў піўным бары

Памятную шыльду да 100-годдзя БНР урачыста адкрылі 7 лістапада ў кавярні BeerShow на вуліцы Валадарскага, 7. Гэты дом ушчыльную прымыкае да будынка, дзе 25 сакавіка 1918 года была абвешчаная незалежнасць Беларускай Народнай Рэспублікі (Трэцяя Устаўная грамата БНР). 

Як паведаміў у Фэйсбуку блогер Эдуард Пальчыс, у кавярні ўрачыста адчынілі самую першую шыльду, зробленую скульптарам Алесем Шатэрнікам у 1993 годзе з сілуміну.

"Гэтая тая самая першая дошка на тарашкевіцы, якая была вырабленая яшчэ ў 1993 годзе з сілуміну. Ну, а новая "народная" дошка з бронзы рана ці позна абавязкова з'явіцца на сваім заслужаным месцы", — піша Пальчыс.

Сёлета ў сакавіку на гістарычным будынку меліся адчыніць бронзавую шыльду ў гонар 100-годдзя незалежнасці БНР. Грошы на яе з дапамогай краўдфандынгу сабралі за некалькі гадзін. Аднак улады спярша далі дазвол на ўсталяванне шыльды, а потым затармазілі яе ўсталяванне, спаслаўшыся на шматлікія звароты грамадзян супраць гэтага памятнага знаку. Пасля гэтага грамадскія актывісты арганізавалі кампанію зваротаў у абарону шыльды, але пазітыўнага выніку ад гэтага пакуль што няма.