У Мінску развіталіся з народным мастаком Гаўрылам Вашчанкам
Жалобная цырымонія прайшла 15 лютага ў Палацы мастацтваў у Мінску.
Развітацца з мастаком прыйшлі сотні людзей. Вакол труны з целам стаялі салдаты ганаровай варты, адзін з якіх трымаў у галаве труны дзяржаўны сцяг Беларусі. Праваслаўны святар адпяваў нябожчыка.
Знакаміты жывапісец, народныя мастак Беларусі Гаўрыла Вашчанка, якому было 85 гадоў, памёр у ноч на 14 лютага ў Мінску.
Ён нарадзіўся 20 чэрвеня 1928 года ў вёсцы Чыкалавічы Брагінскага раёна Гомельскай вобласці. У 1948 годзе скончыў Кіеўскую вучэльню прыкладных мастацтваў, у 1955 годзе — Львоўскі дзяржаўны інстытут дэкаратыўнага і прыкладнога мастацтва. Выкладаў у Кішынёве, а пасля вярнуўся на радзіму і стаў выкладчыкам Беларускага тэатральна-мастацкага інстытута.
Мастак працаваў у галіне станковага і манументальнага жывапісу, у графіцы і дэкаратыўна-прыкладным мастацтве, актыўна прымаў удзел у рознага кшталту выставах, меў персанальныя выставы ў Беларусі і многіх краінах свету, нагадвае БелаПАН.
