У Мінску хочуць будаваць вонкавае метро як альтэрнатыву трамваю
![У Мінску хочуць будаваць вонкавае метро як альтэрнатыву трамваю](/sites/default/files/styles/gallery_main/public/2023-08/transpart-1903.jpg.webp?itok=man2fj_I)
Надземнае метро будзе будавацца ў Мінску як альтэрнатыва гарадскому трамваю. Пра такія планы заявіў віцэ-прэм'ер Анатоль Сівак на сумесным пасяджэнні Палаты прадстаўнікоў і Савета Рэспублікі.
"У Мінску стаіць на парадку дня развіццё трамвая, але не звычайнага гарадскога трамвая. А як альтэрнатывы — вонкавае метро. Мы над гэтым працуем", — перадае БЕЛТА словы Сівака.
Чыноўнік дадаў, што ў генплане сталіцы ёсць кальцавая лінія метро, якая будзе на паверхні.
Такое ж вонкавае метро Сівак прапанаваў пабудаваць у Наваполацку. Ён заявіў, што сам гатовы падключыцца да гэтай працы, бо мае адпаведныя разлікі і дакументальныя матэрыялы, а таксама разуменне, як іх можна адаптаваць.
Дарэчы, той жа Сівак на пасадзе старшыні Мінгарвыканкама заяўляў, што з цэнтра сталіцы ў Сухарава пабудуюць хуткасную трамвайную лінію. Праектаваць яе планавалі ў 2020 годзе.
Анатоль Сівак у 2012-2018 гадах быў міністрам транспарту. Потым Лукашэнка заявіў, што гатовы адправіць яго ў адстаўку за карупцыю ў мінстэрстве. Аднак прызначыў старшынёй Мінгарвыканкама. У верасні 2020-га Сівак стаў намеснікам прэм'ер-міністра.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.