У Мінску эвакуявалі жыхароў са шматпавярховіка — кажуць пра пагрозу абвалу дома

У Мінску эвакуявалі ўсіх жыхароў з дома на вуліцы Шырокай, 3, які быў здадзены ў эксплуатацыю ў 2014 годзе, піша TUT.by. 

Яшчэ паўтара года таму жыхары пісалі звароты ў розныя інстанцыі, каб вырашыць пытанне з апорнай калонай у другім пад'ездзе. Тыдзень таму спецыялісты пачалі рамонт. Мяркуецца, што ў выніку гэтых работ калона пачала разбурацца, а гэта пагражае абвальваннем будынка.

Мясцовы жыхар Аляксандр паведаміў журналістам: "Нам сказалі ўзяць пашпарты і выйсці ўсім на вуліцу. Дом ачапілі, нікога унутр не пускаюць. На фасадзе бачныя расколіны".

У Мінгарвыканкаме кажуць, што ў доме будуць праводзіцца работы па ўзмацненні маналітнай калоны другога пад'езда. Мяркуецца, што яны павінны скончыцца а 20-й гадзіне. 

Жыхароў дома часова прытулілі ў сярэдняй школе №178.