У брэсцкім СІЗА памёр мужчына, абвінавачаны ў абразе Лукашэнкі

9 красавіка ў брэсцкім СІЗА №7 памёр Аляксандр Кулініч, абвінавачаны ў абразе Лукашэнкі, піша сайт "Зеркало".

Падпалкоўніка запасу Кулініча затрымалі 29 лютага ў Брэсце. Акалічнасці затрымання невядомыя. 16 красавіка мусіў пачацца суд над ім. Да суда мужчына не дажыў тыдзень.

Паводле інфармацыі "Зеркало", Кулініч памёр ад ішэмічнай хваробы сэрца. Прынамсі, гэтая прычына пазначаная ў заключэнні аб смерці.

Паведамляецца, што Аляксандр Кулініч нарадзіўся ў Маладзечне 11 красавіка 1972 года. Ён быў падпалкоўнікам запасу, служыў у 38-й асобнай гвардзейскай дэсантна-штурмавой Брэсцкай брыгадзе ПДВ. Апошнім часам працаваў індывідуальным прадпрымальнікам, займаўся харчовымі дадаткамі.

Цела Аляксандра Кулініча, як паведамляецца, ужо выдалі сваякам. Пахаваюць яго ў родным Маладзечне ў дзень нараджэння, 11 красавіка.