Вы тут

У Беларусі нястача медработнікаў: некаторыя ўстановы шукаюць сотні супрацоўнікаў

Усяго ў Беларусі больш за 10 тысяч вакансій, звязаных з медыцынскай сферай / Еўрарадыё 

За паўтара года дэфіцыт дактароў у Беларусі павялічыўся на больш як 7 тысяч супрацоўнікаў. Калі на пачатак 2020 года ў краіне не ставала 3 тысячы медыкаў, то да канца чэрвеня 2021-га ўжо больш за 10 тысяч.

Па стане на 21 чэрвеня ў Рэспубліканскім банку вакансій шукаюць 3071 доктара-спецыяліста, 3038 медыцынскіх сёстраў, 1040 фельчараў, 1222 санітары, 1079 ветэрынарных дактароў, 451 памочніка доктара, 373 фармацэўты, 165 акушэраў і 114 медыцынскіх рэгістратараў, статыстыкаў і дэзынфектараў.

Еўрарадыё звязалася з некаторымі медустановамі Беларусі. Аказалася, што 100 вакансій на адну бальніцу — гэта сапраўды рэлевантныя заяўкі.

 

Моладзь сыходзіць пасля размеркавання

Дзятлаўская цэнтральная раённая бальніца шукае адразу 107 работнікаў. У асноўным гэта медперсанал. Дактароў-спецыялістаў патрабуецца 33, медсёстраў — 38, фельчараў — 5, санітараў — 3.

Маладыя спецыялісты не затрымліваюцца пасля размеркавання / Еўрарадыё

Ёсць і такія вакансіі, як работнік па рамонце і абслугоўванні будынкаў, адміністратар сетак, правізар-тэхнолаг. У аддзеле кадраў пацвярджаюць, што ўсе вакансіі актуальныя.

— Усіх патроху не стае. Кагосьці ж на паўстаўкі шукаем, кагосьці на чвэрць.

Усяго ў бальніцы працуе 690 чалавек, а пасад — 812.

— У нас, у прынцыпе, заўсёды такая нястача была. Цяпер прайшла моладзь адпрацоўку — і звальняюцца. Таму такая цякучасць. Маладых спецыялістаў прыходзіць толькі 14 чалавек [па размеркаванні ў 2021 годзе. — Еўрарадыё]. Перакрыць імі вакансіі, па якіх звальняюцца, мы не зможам.

Складана знайсці і дактароў агульнай практыкі, і вузкіх спецыялістаў, адзначае суразмоўца. Напрыклад, бальніцы патрэбен доктар-кардыёлаг і эндакрынолаг.
 

Укамплектаванасць нядрэнная, але патрэбныя медыкі вузкага профілю

Зусім інакш ідуць справы ў ДУ "432 ордэна Чырвонай Зоркі галоўны ваенны клінічны медыцынскі цэнтр Узброеных Сіл Рэспублікі Беларусь".

Рэспубліканскі банк вакансій паведамляе, што ў вайсковы шпіталь трэба 58 работнікаў. Але ў медцэнтры кажуць, што некаторыя вакансіі ўжо не актуальныя.

Ваенны медцэнтр / yandex.by

— Гэта дактары, сярэдні, малодшы, абслуговы персанал, бухгалтэрыя, юрысты, электрыкі, дворнікі і гэтак далей. У нас укамплектаванасць нядрэнная, але спецыялісты патрэбныя вузкапрофільныя.
 

За паўтара года знайшлі 8 супрацоўнікаў са 110

У Баранавіцкую цэнтральную паліклініку трэба 239 чалавек, гаворыцца на сайце банка вакансій. Па нумары ў адной з аб'яў, дзе пазначана заказчыкам цэнтральная паліклініка, датэлефаноўваемся ў паліклініку №4.

— У нас 239 чалавек дакладна не патрабуецца. Калі нам нехта і патрабуецца, то толькі на 0,5 ці 0,25 стаўкі. Іншыя звесткі па запыце, — адразаюць у паліклініцы №4.

У Расонскай цэнтральнай раённай бальніцы не хапае 50 чалавек.

— Вакансіі ўсе актуальныя, але там дзесьці 0,25 ці 0,5 стаўкі. Астатняе па запыце, — расказваюць нам.

Апошнія суразмоўцы кажуць пра стаўкі, падкрэсліваючы, што не абавязкова на кожную пасаду наймаць новага чалавека. Хтосьці можа проста ўзяць сабе частку стаўкі.

Праблема з медперсаналам назапашвалася ў Беларусі гадамі / Еўрарадыё

Еўрарадыё ўспомніла і пра Полацкую цэнтральную гарадскую бальніцу, дзе паўтара года таму не ставала 110 работнікаў.

— Медсястра не адна патрабуецца, гэта так. У кожнага свае прычыны, чаму звальняюцца: камусьці заробак здаецца маленькім, хто з'язджае. Тут складана сказаць адназначна, — сказалі ў аддзеле кадраў у студзені 2020 года.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.