У Беларусі анансавалі змены па дарожным зборы ўжо з 1 студзеня 2021 года

У Беларусі анансавалі змены па дарожным зборы ўжо з 1 студзеня 2021 года. Замест дзяржаўнай пошліны за выдачу дазволу на допуск транспартнага сродку да ўдзелу ў дарожным руху прапануецца ўвесці транспартны падатак. Першы намеснік міністра фінансаў Дзмітрый Кійко кажа, што яго памер будзе меншы, чым дзяржпошліна (для фізічных асобаў стаўка можа знізіцца ў сярэднім на 25%, для арганізацый — на 15%).

Як паведамляе БЕЛТА, дзяржпошліна можа быць адменена 1 студзеня і праблема прывязкі яе аплаты да праходжання тэхагляду знікне сама сабой. Транспартны падатак будзе ўведзены і для арганізацый, і для фізічных асобаў. Яго будуць спаганяць у залежнасці ад "фізічных параметраў і фактычнага часу валодання транспартным сродкам". Для кіроўцаў легкавікоў прадугледжана больш глыбокая дыферэнцыяцыя ставак — яны будуць павялічвацца ў залежнасці ад вагі машыны.

Стаўкі падатку для пенсіянераў могуць знізіць на 50%, для інвалідаў III групы — на 25%.

Падкрэсліваецца, што сума транспартнага падатку па аўтамабілях вагой 1-1,5 тоны ў сярэднім складзе каля 60-80 рублёў за год.

Дарожны збор дзейнічаў у Беларусі з 2014 года. Летам 2020-га Аляксандр Лукашэнка распарадзіўся адвязаць дарожны збор ад тэхагляду. Такое даручэнне атрымаў урад, у якім над змяненнем парадку выплаты дарожнага збору працавалі ўжо амаль тры гады. Прапаноўваліся самыя розныя варыянты вырашэння праблемы. Прычынай пошуку новых падыходаў да спагнання дзяржпошліны за допуск транспарту да ўдзелу ў дарожным руху стала ігнараванне значнай колькасцю беларускіх кіроўцаў праходжання тэхагляду, бо для гэтага трэба было заплаціць дарожны збор.