Праз Чыжоўскае вадасховішча ў Мінску пабудуюць мост
Будаўніцтва / "Мінск-Навіны"
У Мінску плануюць пабудаваць некалькі новых мастоў. Пра гэта дзяржаўнаму інфармагенцтву "Мінск-Навіны" расказаў дырэктар прадпрыемства "Гардарбуд" Сяргей Панеў.
Адна з такіх будоўляў мост праз Чыжоўскае вадасховішча, які стане працягам вуліцы Малініна ў бок Лошыцы. Тэрміны яго ўзвядзення пакуль не называюць.
Таксама дарожнікі плануюць пабудаваць пуцеправод праз чыгунку ў раёне вуліц Сярова і Паўла Шпілеўскага. Гэтае будаўніцтва пацягне за сабой цэлы комплекс звязаных задач.
"У прыватнасці, будзе забяспечаны вывад Паўднёвай магістралі праз вул. Асаналіева і будаўніцтва паўнавартаснага скрыжавання. Трэба будзе цалкам перабудаваць транспартную схему пад'ездаў да прамысловай зоны, дзе размешчаны "Рыбакомплекс", "Керамін" і камбінат "Клеон", — удакладняе Панеў.
Сярод іншых задач, якія стаяць перад дарожнікамі, разглядаецца пытанне аб праектаванні і будаўніцтве двух развязак на МКАД — падаўжэнне вуліц Карастаянавай і Нававіленскай.
Цяпер у Мінску будуюць пуцеправод паміж вуліцамі Калеснікава і Ратамскай.
