Тысячы фур стаяць на беларуска-польскай і беларуска-літоўскай мяжы
Чарга на беларуска-польскай мяжы / Еврорадио
Тысячы фур стаяць на беларуска-польскай і беларуска-літоўскай мяжы.
Больш за ўсё велікагрузаў чакаюць ўезду ў Літву ў пункце пропуску Прывалка - тут сабралася больш за тысячу грузавых аўтамабіляў.
З пунктаў пропуску ў польскім напрамку аднолькава загружаны Бераставіца і Казловічы. У кожным з іх сваёй чаргі чакаюць больш за чатырыста фур.
Каб патрапіць у Латвію таксама трэба адстаяць чаргу. Усяго на беларуска-латвійскай мяжы ў пунктах пропуску Грыгароўшчына і Урбаны чакаюць больш трохсот велікагрузаў.
Польскі пункт пропуску Кузніца і сумежныя з ім беларускія Брузгі цяпер зачыненыя па ініцыятыве польскага боку. Прычына ў міграцыйным крызісе на беларуска-польскай мяжы.
На днях Польшча паставіла Беларусі ультыматум і заявіла пра намер перакрыць і чыгуначныя перавозкі ў пунктах пропуску Брузгі-Кузніца. У адказ беларускі ГПК праінфармаваў польскі бок аб тым, што паблізу пункта пропуску лагера мігрантаў больш няма, цяпер яны жывуць у лагістычным цэнтры. Беларускі бок хацеў бы зноў адкрыць працу Брузгоў-Кузніцы.
