Сталі вядомыя падрабязнасці, як хлопчык-беларус зваліўся ў раку ў Абхазіі
Гегскі вадаспад / Вікіпедыя
Праверкай па факце падзення беларускага хлопчыка ў раку Гега ў Абхазіі зоймецца пракуратура Гудауцкага раёна, піша apsadgil.info.
Пракурор Эдуард Шамба паведаміў падрабязнасці здарэння. Па яго словах, на Гегскі вадаспад прыехала сям'я з Беларусі — маці з бацькам і двое дзяцей.
"Побач знаходзіцца невялікі пераход праз раку, зроблены з бярвення. Дзіця паставілі на гэты пераход, каб сфатаграфаваць. Ён зваліўся ў ваду. Было моцнае цячэнне, і дзіця знесла. Маці скокнула за ім, але ўжо было позна. Яе таксама ледзь выцягнулі з вады", — паведаміў пракурор.
Ён падкрэсліў, што гэты пераход праз раку не адпавядае нормам бяспекі.
Як распавядала Еўрарадыё, здарэнне адбылося ўвечары 17 чэрвеня. Сям'я з Пінска прыехала ў Абхазію на адпачынак. Чатырохгадовага Аляксандра Вакуліча знесла цячэннем, яго шукалі мясцовыя ратавальнікі.
