Беларуску ў Дагестане асудзілі за відэа з лагатыпам Інстаграма
Сацсеткі, ілюстрацыйнае фота / pexels.com
23-гадовую беларуску Раісу Бернікаву (Шчарбіну) судзілі 7 кастрычніка ў Кізлярскім раённым судзе Дагестана (рэгіён Расійскай Федэрацыі). Маці дваіх дзяцей абвінавацілі ў "дэманстрацыі сімволікі экстрэмісцкіх арганізацый".
Прычынай стала тое, што беларуска ў тэлеграм-акаўнце апублікавала відэа з сімволікай сацыяльнай сеткі Інстаграм. Гэтая сацсетка належыць карпарацыі Meta, дзейнасць якой у Расіі прызналі экстрэмісцкай. Адпаведна, экстрэмісцкай лічыцца і эмблема Інстаграма.
Беларуска ў судзе прызнала віну, і ёй прысудзілі мінімальны штраф — 1000 расійскіх рублёў (каля 12 долараў). Суд хацеў канфіскаваць і "сродак правапарушэння" — тэлефон, аднак дзяўчына заявіла, што згубіла яго.
