Сілавікі затрымлівалі шоўмэна Дзяніса Кур'яна – "Наша Ніва"
Дзяніс Кур’ян / ilinterviews.com
Сілавікі затрымлівалі шоўмэна і тэлевядоўцу Дзяніса Кур'яна, піша "Наша Ніва". Невядома, было гэта кароткатэрміновае затрыманне ці шоўмэн ужо адбыў арышт.
Раней паведамлялася пра затрыманне блогеркі Ганны Бонд і спявачкі Ларысы Грыбалёвай.
Паводле звестак "НН", ад усіх затрыманых патрабавалі спыніць медыйную актыўнасць і бізнес. Выданне адзначае, што ў інстаграм-акаўнтах Кур'яна і Грыбалёвай, якія маюць дзясяткі тысяч фаловераў, ужо з тыдзень не з'яўляюцца новыя публікацыі. Ганна Бонд пасля вызвалення апублікавала некалькі сторыз, але не робіць рэпартажаў, замалёвак, жартаў і рэкламы, як раней.
"НН" са спасылкай на крыніцы ў дзяржСМІ сцвярджае, што ўлады вырашылі абмежаваць папулярнасць блогераў, не залежных ад рэжыму. Пакінуць хочуць толькі лаяльных блогераў, якія супрацоўнічаюць з міліцыяй і дзяржаўнымі тэлеканаламі.
