Арганізацыі пратэстуюць супраць зменаў у заканадаўстве

Падпісанты зварота занепакоеныя зменамі ў Крымінальны кодэкс і закон "Аб грамадскіх аб'яднаннях", а таксама ў закон "Аб масавых мерапрыемствах у Рэспубліцы Беларусь". Аб гэтым паведамляе прэс-служба Асамблеі недзяржаўных арганізацый.

Аўтары калектыўнага звароту пратэстуюць супраць увядзення ў крымінальны кодэкс новых артыкулаў, якія караюць за парушэнне парадку правядзення масавых мерапрыемстваў і за атрыманне безвыплатнай замежнай дапамогі. Новыя папраўкі ў заканадаўства, паводле падпісантаў, створаць дадатковыя магчымасці для палітычных рэпрэсій.

У калектыўным звароце змешчаны заклік да членаў Савета Рэспублікі адхіліць гэтыя законапраекты, якія ўжо былі прынятыя Палатай Прадстаўнікоў Нацыянальнага Сходу 3 кастрычніка ў таемным рэжыме.  Прычынай для адхілення спрэчных законапраектаў аўтары называюць неадпаведнасць іх нормаў патрабаванням Канстытуцыі і міжнародным абавязальніцтвам Рэспублікі Беларусь у галіне правоў чалавека.