"Не раю іншым палітычным уцекачам паўтараць". Меркаванні пра паездку Пачобута ў Беларусь

08/09/2026 - 21:39

Вядомы экс-палітвязень вярнуўся ў Беларусь. Пакуль на тыдзень

Вядомы экс-палітвязень вярнуўся ў Беларусь. Пакуль на тыдзень / фота з яго акаўнту ў Фэйсбуку

8 верасня Анджэй Пачобут, як і абяцаў, вярнуўся з Польшчы ў Беларусь. Ён плануе прабыць у Беларусі тыдзень. Нобелеўскі лаўрэат і праваабаронца Алесь Бяляцкі лічыць, што "гэта сведчыць пра тое, што ён смелы чалавек і гатовы рызыкаваць, дабіваючыся сваіх мэт".

Але пры гэтым Бяляцкі папярэджвае, што сітуацыя ў Беларусі не змянілася.

"Ці сведчыць гэта пра тое, што сітуацыя змянілася і ў Беларусь прыйшла адліга? Не.

У 30-я гады на будаўніцтва Беламорканала, які будавалі палітычныя вязні, вазілі пісьменнікаў, у тым ліку і беларускіх, каб паказаць, як праца перавыхоўвае "злачынцаў". Неўзабаве некаторыя з іх апынуліся на іншых гулагаўскіх навабудоўлях.

Не раю іншым палітычным уцекачам паўтараць тое, што зрабіў Анджэй, каб, сядзячы потым у калоніі, не дакараць сябе за даверлівасць", — папярэджвае Бяляцкі.

Паліталог Павел Усаў разважае пра тое, як прыезд Пачобута ў Беларусь выкарыстае рэжым Лукашэнкі.

"Застаецца таксама пытанне, ці будзе вяртанне выкарыстана як прапагандысцкі сродак нармалізацыі, гнуткасці рэжыму. Ці ж як праява прынцыповай жорсткасці. Ніякіх кампрамісаў, можа зноў дайсці да арышту альбо дэпартацыі.

Не буду выключаць, што з вяртаннем Анджэя Пачобута, якое пакуль выглядае "спакойным", можа пачацца больш актыўная камунікацыя з афіцыйным Мінскам, а таксама першы этап дэрадыкалізацыі сістэмы.

Але пачакаем, чым гэта вяртанне скончыцца. Пакуль, ідэалагічна, гэта на карысць уладам", — лічыць Усаў.

Раней паліталог у эфіры Еўрарадыё выказваў думку, што Пачобута могуць у Беларусі забіць расійскія спецслужбы.

Палітычны аглядальнік Аляксандр Класкоўскі ў матэрыяле для "Позірка" напісаў, што вяртанне Пачобута ў Беларусь "не стала сенсацыяй" і нагадвае, што ў яго доўгая гісторыя супрацьстаяння з рэжымам.

"Як бачым, у асобе Пачобута рэжым сутыкнуўся з крэпкім арэшкам. І яго паездка ў Беларусь — чарговы мужны ўчынак.

Нехта ў Польшчы яго адгаворваў. Намеснік міністра ўнутраных спраў і адміністрацыі Чэслаў Мрочак адкрытым тэкстам заявіў, што вяртанне Пачобута ў Беларусь "нясе велізарную рызыку для яго", — піша Класкоўскі.

Ён параўноўвае ўчынак Пачобута з учынкам Мікалая Статкевіча, які адмовіўся быць дэпартаваным з Беларусі пасля вызвалення ў выніку намаганняў ЗША.

"Цяпер пальчатку рэжыму кідае Пачобут. Незадоўга да вяртання ў Беларусь ён сустрэўся з папам рымскім. Гэта можа служыць пэўнай страхоўкай: Мінск зацікаўлены падтрымліваць адносіны з Ватыканам. Дарэчы, менавіта Святы пасад у выніку разрулiў сітуацыю з мітрапалітам Кандрусевічам.

Але, мабыць, яшчэ мацней беларускае кіраўніцтва зацікаўлена, каб працягваліся польскі і амерыканскі трэкі, праз якія яно спадзяецца прабіць ізаляцыю на заходнім накірунку", — сцвярджае Класкоўскі.