Праваабаронцы: АМАП затрымліваў людзей у паліклініцы і доме культуры
Затрыманні ў Беларусі / фота ілюстрацыйнае
Аблава сілавікоў прайшла ў гарадскім пасёлку Карэлічы Гродзенскай вобласці, пішуць праваабаронцы MAYDAY Team. Паводле іх звестак, АМАП затрымліваў людзей у мясцовай паліклініцы, доме культуры і райвыканкаме.
Вядома, што раніцай у Карэліцкай цэнтральнай раённай паліклініцы затрымалі некалькіх дактароў і стаматолага. З астатнімі правялі "прафілактычныя гутаркі" пра падпіскі на экстрэмісцкія рэсурсы.
У мясцовым райвыканкаме затрымалі яшчэ двух чалавек. Сілавікі таксама затрымалі некалькіх супрацоўнікаў "Карэліцкага раённага цэнтра культуры і народнай творчасці".
"Хутчэй за ўсё, усіх затрыманых абвінавачваюць у "распаўсюдзе экстрэмісцкіх матэрыялаў", — пішуць праваабаронцы.
Яны адзначаюць, што затрыманні ў раёнах Гродзенскай вобласці ўжо зрабіліся тэндэнцыяй. Толькі ў Карэлічах да людзей прыходзяць ужо другі раз за нядоўгі час. "Аблавы" прайшлі таксама ў Лідзе.
