Прадпрыемствам дазволілі не прадаваць валютную выручку
Беларускім прадпрыемствам дазволілі не прадаваць валютную выручку – гэта прапісана ў новым прэзідэнцкім указе “Аб адмене абавязковага продажу замежнай валюты”. Такая норма матываваная лібералізацыяй валютных адносінаў і стымуляваннем актыўнасці бізнэсу.
Цягам многіх гадоў абавязковы продаж валюты прадпрыемствамі быў стрымліваючым фактарам, бо разглядаўся інвестарамі як інструмент дзяржаўнага рэгулявання і эканамічнага абмежавання. Пачынаючы з 2016 года тут адбывалася паступовая лібералізацыя – тады Нацбанк знізіў нарматыў продажу з 30% да 20%. Летась трэба было прадаваць дзяржаве толькі 10% ад валютнай выручкі, а цяпер увогуле можна гэтага не рабіць.
Адметна, што пасуповае зніжэнне нарматываў продажу валютнай выручкі не адбілася на прапанове валюты на ўнутраным рынку. Таксама адзначаецца стабільнасць абменнага курса беларускага рубля.
